pagina de presentacion / questions e fica de vocabulari / sintèsi

Aquel document es la primièra pagina d'una benda dessenhada titolada : Las sèt bòlas de cristal. Es una aventura de Tintin e Milon, conceguda per Hergé.

Podèm descobrir los primièrs elements de l'enquèsta que serà menada dins aquel episòde : s'agís d'una expedicion etnografica, l'expedicion "Sandèrs-Ardmut", que ven de tornar en Euròpa aprèp un viatge al Peró e en Bolivia. Los exploradors descobriguèron fòrça cavòts incas e dins un d'aqueles trobèron una momia encara encapelada del diadèma reial d'aur massís. Podèm donc devinar que l'aventura serà ligada probablament a aquel diadèma.

Dins la primièra vinheta podèm veire un tren que camina dins la natura, es un tren de vapor, que de fum s'escapa de la chimenèia.

Dins la segonda vinheta, descobrissèm quatre personatges : a man esquèrra, tres òmes assetats sus la banqueta del vagon legisson lo jornal ; al pè de la fenèstra, Milon sembla legir coma son mèstre. Lo primièr d'aqueles òmes pòrta de lunetas e fuma lo cigar ; aquel que se tròba al mièg pòrta un capèl melon e fuma la pipa. Sens aquel detalh podriam creire qu'es un dels fraires Dupont, legís per dessús l'espatla de Tintin. A drecha, en fàcia dels tres òmes, una femna es assetada, es vestida d'un mantèl amb un còl de forradura e d'un capèl, pòrta un sac a man suls genolhs e lo ten plan sarrat. Aqueles personatges son plan vestits (costume e carbata pels òmes, polit mantèl per la femna).

Las vinhetas que sègon nos mostran la convèrsa que se dabana entre Tintin e l'òme del capèl melon. L'òme s'adreiça a Tintin a prepaus de çò que ven de legir dins lo jornal (e qu'avèm descobèrt en legiguent la tresena vinheta de la pagina). Tintin sembla susprés e benlèu un pauc inquièt ; l'òme parla de mòrts misteriosas, de cavòts dubèrts... Començam a dintrar dins l'istòria e a nos pausar de questions coma o fa Tintin, mas lo tren arriba en gara e Tintin ne davala.

Dins la darrièra vinheta podèm veire lo cai amb fòrça mond que davalan del tren. Milon precedís son mèstre, totes dos s'avançan cap a la sortida, coma la femna que se trobava amb eles dins lo compartiment. Un òme agacha per la fenèstra del vagon, es benlèu l'òme del capèl melon.

Aquela primièra pagina nos met sul pic dins un ambient de mistèri. Podèm ja devinar que Tintin se va ficar dins l'afar d'aquela expedicion e benlèu tanben los autres passatgièrs del compatiment. Podèm tanben establir un ligam amb lo titol de la benda dessenhada. Las sèt bòlas de cristal seran aquelas del "borla" descobèrt amb la momia de l'incà Rascar Capac.

L'istòria comença amb l'arribada d'un tren e s'acabarà amb lo despart d'un avion que nos menarà cap a de novèlas aventuras que se debanaràn dins Lo Temple del Solelh.

 .........................................................................................................................................................................................