Los collegians del percors bilingüe occitan de Sant Somplesi an rescontrat l’artista provençal Dijòus 11 de junh, los collegians del percors bilingüe occitan del collègi Pèire Suc de Sant Somplesi visquèron un moment fòrt de lor annada escolara en aculhissent l’artista occitan Rodin Kaufmann per un concèrt seguit d’un escambi privilegiat.
Tot long de l’annada, los collegians de la 6a a la 3a an trabalhat a l’entorn d’una question centrala: cossí un artista contemporanèu pòt uèi crear, exprimir d’emocions e parlar del monde en occitan? A travèrs de l’estudi de mantunab cançon de Rodin Kaufmann, an descobèrt un univèrs artistic original mesclant poesia, rap, trap, hip-hop e musicas electronicas, tot en s’interrogant sus las tematicas abordadas per l’artista e sus la plaça de la lenga occitana dins la creacion contemporanèa.
Nascut en Alemanha, aprèp aver crescut entre Marròc, Egipte e Liban abans de s’installar prèp de Marselha, Rodin Kaufmann es un artista amb d’influéncias multiplas. Poliglòt, poèta, cantador, rapaire e compositor, a causit de far de l’occitan una de las lengas de sa creacion artistica. Sos tèxtes, modèrnes e engatjats, testimònian d’una dobertura sul monde qu’a particularament interessat los escolans.
Lo concèrt a permés als collegians de descobrir en dirècte l’energia e la sensibilitat de son repertòri. Plan lèu, l’artista saupèt crear una vertadièra proximitat amb son jove public. Los escolans cantèron qualques repics trabalhats en classa, acompanhèron los ritmes,participèron activament a l’espectacle e quitament dancèron amb l’artista pendent mantun tròç particularament entraïnant.
Aquel rescontre foguèt tanben l’escasença d’un moment d’escambi ric jos la forma d’un «bòrd d’empont». Curioses e entosiastas, los escolans avián preparat fòrça questions.
Atal poguèron descobrir las sorsas d’inspiracion de Rodin Kaufmann, comprene son caminament d’escritura e de composicion, escambiar sus sos viatges, sos projèctes artistics, la preparacion de sos concèrts o encara la significacion de qualques unes de sos tatoatges. L’artista se prestèt amb generositat a aquel exercici, en respondent amb sinceritat e umor a las interrogacions dels collegians.Al delà de la descobèrta musicala, aquel rencontre a permés als escolans de desvolopar lors competéncias lingüisticas en occitan, d’enriquir lor vocabulari de las emocions e de la musica, d’exprimir lors opinions e de mesurar que l’occitan es uèi una lenga de creacion,
capabla de portar de messatges contemporanèus e universals.
Una experiéncia marcanta que demorarà longtemps dins las memòrias e qu’illustra plenament la vitalitat de la lenga e de la cultura occitanas al prèp de las joves generacions.
Aqueste rencontre s’inscriu dins lo dinamisme de l’ensenhament bilingüe a Sant Somplesi, ont prèp de 300 escolans son uèi escolarizats dins aquel cursus de la mairala al licèu. Un dispositiu que coneis un desvolopament regular gràcias a l’engatjament de las equipas pedagogicas, al sosten de las collectivitats territorialas e a l’adesion creissenta de las familhas, convencudas de la riquesa lingüistica, culturala e ciutadana qu’ofrís lo bilingüisme occitan-francés.
Olivier CAPONI
Veire l’article sul Jornalet : https://www.jornalet.com/nova/24559/los-collegians-del-
percors-bilingue-occitan-de-sant-somplesi-an-rencontrat-rodin-kaufmann
Sant Somplesi: al rescontre de Rodin Kaufmann