" Tot destimborlat, lo gal de la giroleta vira e revira coma un bèl diable dins las ventadas de l'Autan "
Escrivètz la seguida !
Los bibliotecaris del Lector del Val (associacion de bibliotècas del Lauragués e sud-èst tolosan) organizan lor XXen concors de novèlas, dobèrt a totes e a gratís, fins al 16 de febrièr de 2018.
Per la seisena annada, los escrits en lenga occitana son planvenguts gràcias a la collaboracion de l'associacion Fèsta d'Òc e de la Calandreta de Castanet-Tolosan.
Lo concors compta quatre categorias : primari, segondari, licèus, adultes (los tèxtes collectius son permeses se fan partida de l’ensenhament d’una classa tota). Lo tèxte deu necessariament començar amb la frasa çai-sus. Lo genre demòra liure : fantastic, policièr, sciéncia-ficcion, istoric, romanèsc, aventura, etc… o pas brica de genre que siá.
Totas las varietats de la lenga d’Òc son planvengudas, a carga pel participant de passar l’incipit dins sa varietat pròpia.
Se pòt tanben participar en francés, a partir de la frasa : "Déboussolé, le coq de la girouette s'agite comme un beau diable dans les rafales de l'Autan."
La remesa dels prèmis se debanarà a la debuta del mes de junh de 2018, e la remesa dels recuèlhs de novèlas als autors es prevista per octobre de 2018 a Diagora-Labège. Un CD audiò dels melhors tèxtes occitans serà fargat en mai de l’edicion del libre.
Per mai d'entresenhas o per obténer lo reglament : info@lecteurduval.org ou tél. 05.61.00.51.16.
o sus la pagina : http://www.lecteurduval.org/310-concours-nouvelles.html
